Gudbay para sa isang makata (kantula)

Gudbay para sa isang makata                    (kantula)

Tulad ng yosi,

          nauupos.

Tulad ng alak,

          nauubos.

Tulad ng boses,

          napapaos.

Tulad ng awit,

          natatapos.

Sabi nga, lahat ng may simula ay may katapat na katapusan.

(Pero bakit patuloy pa ring nakagapos

at ang bitin pa nga’y ang tangkang paghuhulagpos?

Bakit ang mga tanong, hindi maubos-ubos

at kasagutan ay kadalasang hindi lubos?)

sagot na naman ba’y ewan.

bakit kung sino ang dapat

maiwan ay

siya pa ang nag-iiwan ng paalam?

Tulad ng rosas,                                                                                 

          nalalagas.

Tulad ng kulay,

          kumukupas.

Tulad ng oras,

          lumilipas.

Tulad ng buhay,

          nagwawakas.

Sabi ko, lahat ng katapusan, kawalang bagong pinagmumulan.

(At kung hindi man magwakas ang akmang pag-alpas,

ang pagnanasa ay patuloy na magniningas.

At kung mga sagot man ay tila umiiwas,

sa paglalakbay ay patuloy na papagaspas)

at ang tula ay hayaan

dahil kung ang maiwan man

ay paalam,

may sining naman na walang kamatayan.

may ningning ang paalam,

maningning... ang paalam,

paalam, paalam...                                                          

 -kantula

sa panahon man ng paglisan at paalam, rock on...